Sa gawing timog-silangan ng bayan ng Mabini ay makikita ang isang barangay na dati-rati'y isa lamang sityo ng nayon ng Saguing. Ito ay ang Gasang na nakatayo sa baybaying dagat.

Mahabang panahon na walang paaralan dito. Ang mga batang mag-aaral ay pumapasok sa paaralan ng mga karatig nayon tulad ng Talaga at Saguing na kanyang Inang-nayon. Dahil sa unti-unting pagdami ng tao at nalalasap nila ang paghihirap ng maliliit na mga batang mag-aaral na umakyat pa sa bundok o kaya ay tumatalima sa malalakas na baha sa mga sapa, ang mga ilang matatanda tulad nina Ginoong Victorino Alolod, Antonio Bautista, at Emilio Bueno ay nagsikap upang magkaroon ng sariling paaralan. At ito ay ipinagkakaloob ng pamahalaan noong taon 1941 na nagsimula sa unang baitang lamang ng mababang paaralan. Habang lumalakad ang panahon, dumarami ang mga tao at noong taong panuruan 1960-1961 ang paaralang ito ay naging isang kumpletong elementarya sa pamumuno ni G. Modesto Castillo. Siya ay nanungkulan dito bilang punong-guro hanggang sa ika-3 ng Setyembre, 1975 at hinalinhan naman ni Gng. Miguela B. Calangi hanggang sa kasalukuyan. Sa panuruang taong kasalukuyan (1978-1979) dalawang daan at dalawangpu't-pito (227) ang mga batang nagsisipag-aral dito sa ilalim ng pagkakandili ng walong guro (8) guro. Ang mga batang lalaki ay isang daan at labing apat (114) at ang mga babae naman ay isang daan at labing tatlo (113).

     Unti-unti ring umunlad ang kanyang pamayanan, una'y sa tulong ng likas na kayamanan ng barangay at ikalawa ay sa sipag at tiyaga sa hanapbuhay ng mga naninirahan. Palibhasa'y ang lugal na ito ay nasa baybaying dagat, ang mga lalaki ay nangingisda. Pagkatapos nilang mangisda, hindi nila kinaliligtaang bunngkalin ang kani-kanilang mga lupain. Ang mga babae naman ay humahabi naman ng sinamay. Ang bawat pamilya ay may alagang mga hayop tulad ng baka, kambing, baboy at manok.

     Ngunit ang mga naninirahan dito ay hindi rin nasiyahan naito ay isang sityo lamang. Sa pangunguna ni G. Juanito Panopio, Simeon Chavez, Emilio Bautista, Sabas Balita, Benancio Mañibo, Maximo Alolod, Fortuanto Escalona at Calixto Basilan ang sityong ito ng Gasang ay naging isang nayon noong Disyembre 13, 1967.

     Patuloy ang pag-unlad ng lugal na ito lalung-lalo na ng iahyag ng Pangulong Marcos ang Batas Militar. Ang mga tao'y may kusang loob na gumawa at makipagkaisa sa kilusan at gawaing panlipunan. Sila ay nagtutulungan sa paglilinis at pag-aayos ng lansangan at lalung-lalo na sa pag-uunlad ng kabuhayan. Natuklasan ng isang masipag na naninirahan dito, sa katauhan ni G. Silvestre Arago ang isang industriya na ngayon ay siyang hanapbuhay ng maraming tao kahit na ang mga kababaihan at mga batang eskwela sa buong barangay at sa mga karatig nayon. Nagdudulot ito ng llibu-libong salapi sa nga namumuhunanan gayundin sa mga manggagawa. Ito ay ang pagyari ng mga silya at mesa na ginagamitan ng buto ng buli, oway at taling plastik.

     Sa kasalukuyan, marami ang mga kabataan na nag-aaral sa mga mataas na paaralan sa bayan at gayundin sa mga pamantasan sa Lungsod ng Batangas at Maynila. Marami na din ang nakapagtapos ng karra tulad ng mananaggol, enhinyero, narses, komadrona, guro at iba pa. Maipagmamalaki ng nayon ang dalawang anak niya. Sila ay sina G. Antonio Panopio na nagkamit ng ikasiyam sa pinakamataas na umiksamen sa "Bar" at si G. Rodrigo Mañibo na ngayon ay isa na sa mga mayhawak ng mataas na tungkulin sa "Philippine National Bank" sa Maynila.

     Kaya't masasabi nating ang barangay Gasang ay hindi huli sa kabihasnan.